当前位置: Sawcuengh > yiengh ndei Mbanjcuengh

Cietfwen Byafouz

2020年09月25日    来源:广西民族报    作者:Maj Veiyungz comz hoiz    字号:[    ]

Yienjheiq ndei yawj yinx vunzlai humxyawj.

Cietfwen youq gwnz Byafouz hoenghhwd haidaiz.

Ngoenz cietfwen vunz lai vunz daih.

Lwgmbauq dahsau doiqfwen haenqhwd.

Saeceij caemh daeuj dem nauhyied.

Doih yienjheiq daeuj dem angqyangz.

Ngoenzciet gizgiz doiq fwen haenq.

Ngoenzciet ceiq ngamj lwgmbauq dahsau doxgyau.

Aenmiuh gaeuqgeq hoenzyieng hoengh.

Gij heiq ndei yawj cit riengz cit yienj mbouj dingz.

  Cietfwen Byafouz dwg aen ciet Bouxgun caeuq Bouxcuengh、Yauzcuz daengj siujsoq minzcuz Bazbu Gih Hocouh Si doengzcaez gvaq haenx, hix dwg aen daiqbiuj denjhingz hawfwen vwnzva Gvangjsih ndeu. Cietfwen Byafouz baumiz song aen ciet: Geizbauq Miuhbyafouz ngoenz liggaeuq ndwenseiq ngeihloeg、ciet- fwen ngoenz liggaeuq ndwenngux cibgouj.

  Cienznaeuz youq Dangzciuz, Cinz siucaiz, boux youqlaeng Mbanj Dayaz henz Byafouz haenx bae Gingsingz gaujsi, ranz de gungzhoj, boux vunz de hix cingqcig, aenvih mbouj nyienh oetcienz hawj gaujguen, gauj baenz geijlai baez cungj gauj mbouj ndaej, doeklaeng de ndatheiq lai couh dauqma mbanjranz, youq Byafouz gag youq. De ciengzseiz youq henz dah epbya, caeuq dahlwg boux dwkbya doiqfwen, vih gyoengq beixnuengx cauhruz hix mbouj aeu ngaenz. De gvaqseiq le, gyoengqvunz youq gwnz Byafouz guh le Miuhcinz- vuengz、Daizepbya、Laeuzdoiqfwen ma geiqniemh de. Youq ngoenzseng caeuq ngoenzdai de, gyoengq beix- nuengx cungj doxcomz youq Byafouz doiqfwen, yienghneix couh menh- menh bienqbaenz aen cietfwen hoenghhwd ndeu lo.

  Geizbauq Miuhbyafouz ngoenz ndwenseiq ngeihloeg, dwg vih le hoh ngoenzseng Cinzvuengz. Gij hozdung conzdungj miz: Duzyou Cinzvuengz youzhaw、eu fwen、foux lungz foux saeceij、Heiqmbaetcaz dangdieg daengj. Ngoenz gonq, gyoengqvunz sien cingj duzyou Cinzvuengz bae daengz Laeuzmuenghdah gonq, caiq eu gij fwen bonjdeih; eu sat le, couh ram duzyou Cinzvuengz daengz aen Miuhbaekfouj goengveigoz Lij Cing haenx bae, hawj songde gangjgoj; ngoenz cietfwen banhaet caet diemj daengz gouj diemj, couh aeu cingj duzyou Lij Cing caeuq duzyou Cinzvuengz itheij bae cunzyouz, gyoengqvunz ram duzyou songde sien hopngomx aen singz byaij baenz gvaengx le, cij bae Miuhcinzvuengz Byafouz guh cuengqcaeq; buiz sat le, couh hainduj foux lungz foux saeceij, roq laz hainduj yienjheiq, singfwen hix yiengj dwk mbouj dingz mbouj duenh. Ndwenngux cibgouj hix dwg ngoenzdai Cinzvuengz, aenvih de lij lix seiz gig maij eu fwen, ndigah ngoenz haenx cawz caeqbaiq le, gyoengqvunz cungj dwg eu fwen lai, biujdap gij cingzeiq siengjniemh de.

  Ngoenz cietfwen, henz dah dap baenz geij aen daizheiq, gyoengq canghfwen hwnj daiz bae beij byawz eu ndaej ndei, gij ciengzmienh gig nauhyied. Gyoengqde cungj dwg baenz aen mbanj baenz aen mbanj guh aen doih ndeu, boux eu ceiq ndei haenx guh boux daeuz he, boux miz gingniemh haenx hix youq baihlaeng caeuq ok cawjeiq ok geiqmaeuz. Gij hingzsik yienjciengq miz lai cungj, ndawde suenq daizbeij eu fwen doxdax ceiq miz daegsaek, boux baij daizbeij haenx dwg bouxhingz baez gaxgonq doxdax haenx. Gij fwen songde doiq ne hix dwg mbouj dingh, cungj dwg doq bien doq eu, ciengzseiz ngoenz ndeu eu sat, danghnaeuz sawhingz mbouj caengz dingh, youh rongh daeng dwk laebdaeb doxdax, mbangj mbat vanzlij eu daengz ranzrongh bae. Linghvaih, lij miz gyoengqvunz habciengq、fwenyoux doiqciengq、bouxdog gag ciengq daengj lai cungj hingzsik. Gij fwen eu gijmaz ne? Miz gij gojgaeq lizsij、cingzgyaez doxaeu、guhhong ngoenznaengz、gwnzbiengz ndwenngoenz daengj. Gij cungjloih fwen caemh lai cungj lai yiengh, lumjbaenz gij fwen dangdieg “Lij lo hei”、gij fwen Maxgai “Dingh dungh dingh”、 gij fwen Daningz “Diuq lienzsanh”、gij fwen Yauzcuz “Diuq lah fah”. Ngoenz haenx, seiqhenz Byafouz dwg ciengzfwen, gwnzgwnz lajlaj cungj dwg daizheiq, baenz aen Byafouz cungj bienqbaenz haijfwen liux, gij singfwen gak cungj gak yiengh haenx, mwngz eu sat caiq daengz gou, hawj vunz dingq dwk mbouj sij maranz bae.

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部