当前位置: Sawcuengh > faenzcieng cauhdaeuz

Mehmbwk Co Ranz

2020年09月25日    来源:广西民族报    作者:Yiz Ciz / 余 执    字号:[    ]

  Boux dai gaenq bae faenh de, boux lix lij aeu gwndaenj. Daeggvan nai Banh Gveivah naeuz:“Raeuz lij miz dahniq, mwngz aeu naemj bae gyae di, danghnaeuz mwngz laemx roengz caiq hwnq mbouj ndaej, ranz raeuz couh sanq liux lo.”

  Seizhaenx Siujcouh ndaej 8 bi, de roxsoq lingzleih, daxmeh ngoenzngoenz loenq raemxda, de ciengzciengz got daxmeh naeuz:“Meh, mwngz gaej siengsim lai, go gou mbouj miz lo, lij miz gou, gou mbouj liz mwngz, gou hix ciengx mwngz daengx ciuh.”

  Miz daeggvan doxing doxbaengh, miz dahlwg rox raeuj rox gyoet, Banh Gveivah menhmenh haisim hwnjdaeuj, seng’eiq ciuq guh, saedceij ciuq gvaq.

  Daeggvan Banh Gveivah baenzmbauq lauxsaed, de ien mbouj cit, laeuj mbouj gwn, bej mbouj dwk, doj mbouj guh, ngoenzngoenz laemxsim caeuq Banh Gveivah itheij laeuq cienz cauxgya. Doengxngoenz, Banh Gveivah yawj diemq guh gaicawx, daeggvan bae rag huq soengq huq, gvanbaz doxbang doxhuz, doxgingq doxgyaez.

  Doengxhaemh haeujninz, gvanbaz cungj dwg gangjgangj goj, lumjnaeuz gij vah gyoengqde gangj mbouj rox liux gvaq.

  Miz haemh ndeu song boux caemh swiz ninz youq gwnz congz gangjgoj. Daeggvan naeuz:“Duenh seizgan neix gvaqdaeuj, gou roxnyinh aen dungx mbiengj baihgvaz gou cungj dwg innumnum, mbouj rox dwg baenzlawz yiengh lo.”

  Banh Gveivah dingq le, yat naengh hwnjdaeuj, cam:“Geijlai nanz lo?”

  Daeggvan naeuz:“Couh geij ngoenz neix, seizneix lij roxnyinh in ni.”

  Banh Gveivah hwnz he ninz mbouj ndaek, ngoenzlaeng ranz baez rongh, de couh heuh daeggvan hwnqdaeuj, song boux doxbuenx bae yihyen gemjcaz, diemq mbouj hai gonq, seng’eiq mbouj guh gonq.

  Canghyw naeuz aen daep daeggvan Banh Gveivah baenz in, danghnaeuz daeuj genjcaz caeuxdi, dawz giz daep hwnj in haenx gvej bae, lij ndaej gouqmingh, seizneix ceiz lo, gaenq gouq mbouj ndaej gvaq, dauqbae ra ywdoj gwn, ndaej gyaeu geijlai nanz suenq geijlai nanz lo.

  Banh Gveivah youh deng byaj bag baez ndeu, de youh laemx roengz lo.

  Vah bouxgeq naeuz “boux vunzndei fanj dai, boux nyapnyaj fanj lix”, daeggvan Banh Gveivah dai lo, Banh Gveivah ngoenzngoenz gwn raemxda guh imq, daej ndaej song da raiz lo, song aen rwz hix lwngq lo.

  Roek

  Ndawranz couh Banh Gveivah boux ndeu gvaq saedceij, de mbouj miz sim guh seng’eiq, hix mbouj rox baenzlawz guh cij gvaq ngoenz daengz haemh, de baenzngoenz ndang fouzfangfang caemhcaiq mbwqlanglang. Ranznden miz vunz dwk bej, mizseiz 4 boux noix boux he seiz, gyoengqde couh heuh Banh Gveivah bae dingj gonq.

  Banh Gveivah haq daengz gwnz haw cibgeij bi, cungj mbouj rox baenzlawz dwk bej, seizneix de hwnj yinx lo, mbouj noix saek ngoenz mbouj bae caeuq vunz dwk bej, miz ngoenz dwk bej daengz haemh mbouj hai dou guh seng’eiq.

  Ranznden miz bang vunz ndeu dwk bej guhcaemz, miz bang vunz ndeu dwk bej aeu ngaenz, Banh Gveivah caeuq vunz dwk bej aeu ngaenz ngoenz daih’it de couh dwk ndaej 230 maenz, de gag naemj: Ngoenzneix souhaeuj beij guh gaicawx souhaeuj lij lai.

  Banh Gveivah ndawranz guh seng’eiq geijcib bi, lainoix rom miz di ngaenz, baez miz vunz daeuj dwk bej, vunz cungj maij heuh de bae dwk. Banh Gveivah roxnyinh dwk bej ndaej sanqsim gejheiq youh miz cienz canh, ngoenzngoenz angqvauvau, yienznaeuz de bak gangj mbouj lingz, rwz dingq mbouj swnh, de gag naemj, daj de caeuq vunz dwk bej gvaqdaeuj, cungj mbouj caengz saw ngaenz gvaq. Miz gij saeh ndei neix baenzlawz mbouj guh, de vunz sau mingh mbang, gangj mbouj dingh dwg mehmbwn mizeiq bang de, hawj de baihdoeng mbouj rongh baihsae rongh ni.

  Ngoenz ndeu Banh Gveivah dingqnaeuz miz geij boux vunz bouxboux daiq geijcib fanh maenz ngaenz daeuj dwk bej, de dingq le, angq ndaej ranz caengz rongh couh hwnqdaeuj guh hongranz, de dajsuenq ngoenzneix aeu ndeindei bae “hoenx” ciengz ndeu.

  Ciuq gij gingniemh doenghbaez dwk bej, Banh Gveivah nyinhnaeuz, de baez roengz ngaenz hung, vunz couh mbouj gamj aeu, vunz mbouj gamj aeu, de couh hingz lo. Ndigah de baezbaez ndaej hingz ngaenz.

  Ngoenzneix Banh Gveivah daiq 10 fanh maenz ngaenz gaen ndang, de naemj: Vunz naeuz cib baez doj gouj baez saw, gou mbouj saenq, ngoenzneix dwk ndaej geijlai couh suenq geijlai, gou caiq hix mbouj dwk lo.

  Hai daiz buenq aen lai cungdaeuz, Banh Gveivah hingz ndaej fanh lai maenz ngaenz, de gaenq naemj dingz roengzdaeuj mbouj caiq dwk lo, youh gag naemj: Ngoenzneix caijsoq baenzneix ndei, gangj mbouj dingh yaep dem hingz ndaej engq lai ni.

  Banh Gveivah naemj daengz neix, yaek hai bej de dawz cibgeij fanh maenz ngaenz cungj cuengq okbae. Seizneix miz vunz youq baihlaeng rag de baez ndeu, eiqsei dwg heuh de gaej yienghneix baez he cuengq baenzlai ngaenz. Banh Gveivah ceiq simnyap miz vunz daeuj nyoegnyauz de, de dacaengz boux de baez he, laebdaeb guh faenh de.

  Hai bej okdaeuj seiz, Banh Gveivah saw lo, saw ndaej gwnz ndang faen he hix mbouj miz lo. De simdiuq boebboeb song ga saenzdidi. Boux ranznden gvaqdaeuj rag de gvaq mbiengj he bae, naeuz:“Mwngz cungj saw bae baenzlai ngaenz lo, gaej dwk lo.”

  Banh Gveivah hix naemj gvaq mbouj caiq dwk lo, hoeng de doiq boux ranznden naeuz:“Gou ngoenzneix itdingh aeu hingz dauq gij ngaenz gou, danghnaeuz gou caiq miz song fanh maenz ngaenz couh baenz lo.”

  Boux ranznden ciq song fanh maenz ngaenz hawj Banh Gveivah, mbouj daengz song baez, de youh saw caez lo, Banh Gveivah ma dai mbouj lau raemx goenj, de caiq ciq ngaenz, caiq saw, caiq ciq ngaenz…… Ngoenzneix de caenh dwg saw ngaenz ndwi!

  Caet

  Banh Gveivah cungj dwg ninz mbouj ndaek, de sim hoengqvangvang, ukgyaeuj luenhfoenfoen. De sawqmwh roxnyinh saedceij caen hoj gvaq, gietdingh mbouj caiq dwk bej lo, ngoenzngoenz haeujsim hai diemq guh gaicawx.

  Ngoenz ndeu haetromh, Banh Gveivah hwnqdaeuj couh hai diemq guh gaicawx, boux ranznden ndeu gvaqdaeuj caeuq de gangjgoj. Ranznden naeuz:“Gou caen dwg mingh mbouj daiq caiz, haemhlwenz gou cawx ‘max’, cij cawx 80 maenz, doeklaeng caen deng dahraix. Danghnaeuz gou cawx saek geij cien maenz, roxnaeuz cawx geij fanh maenz, ciuh neix gou lij guh maz hong dem, lij baenzlai sinhoj! Hei! Ndaw mingh gou mbouj daiq caiz ha!”

  Banh Gveivah rox, boux ranznden dwg cawx luzhozcaij, deng le cawx maenz ndeu couh ndaej 40 maenz. De baez ndaejnyi gij vah ranznden, hix miz di sim humz.

  Youh dwg haemh ok “max” ndeu, Banh Gveivah cawx le 10 maenz luzhozcaij, de gingqyienz couh deng lo, ndaej 400 maenz ngaenz. Banh Gveivah lumjnaeuz yawjraen miz roen byaij lo, baez daengz haemh ok “max”, de couh cawx, mbouj rox vihmaz, de baez cawx couh deng, baezbaez ndaej ngaenz.

  Banh Gveivah naemj: Cawx luzhozcaij dangq guhcaemz, cawx noix di couhcinj saw le hix mbouj youqgaenj. Banh Gveivah doq guh seng’eiq doq haeujsim naemj luzhozcaij, duenh seizgan he gvaqbae lo, de caen canh ndaej haujlai ngaenz, gaxgonq gij ngaenz caeuq ranznden ciq hix boiz ndaej dingz lo.

  Miz haemh ndeu, Banh Gveivah lumj fatbag nei, de youh ciq ranznden aeu 3 fanh maenz ngaenz, dajsuenq cawx baez hung neix le, couh mbouj caiq guh lo. Caen dwg meuz geq hix doek ringj, lingz geq hix doek dat. Haemhde, Banh Gveivah vut ok 3 fanh maenz ngaenz, mbouj ndaej saek faen doxdauq.

  Siujcouh naeuz daxmeh de yiemq vunz haujlai ngaenz, aenvih vunz ciq ngaenz hawj mwngz, mbouj boiz caez moix ngoenz cungj miz leihsik, ciq nanz leihsik aiq beij gij ngaenz ciq lij lai, vunz ngoenzngoenz daeuj gyaep caiq, daxmeh de mbouj miz ngaenz boiz vunz, hix mbouj miz sim guh seng’eiq lo, couh gven dou daeuj yienhsingz co ranz youq. Daeuj ndaw singz le daxmeh de youh lau vunz hwnj ranz gyaep caiq, daengxngoenz mbouj gamj haidou. Siujcouh naeuz de youq baihrog dajgoeng couhdwg ra ngaenz bang daxmeh boiz caiq, mboujnex de caeux couh ndaej youq ndaw singz cawx ranz lo, seizneix cijndei co ranz hawj daxmeh de youq gonq.

  (sat)

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部