当前位置: Sawcuengh > faenzcieng fanhoiz

Geiq Liebbyaij(14)

2020年09月25日    来源:广西民族报    作者:Lij Yozyez sij Luz Yaujli hoiz    字号:[    ]

  Daxboh gou hainduj fak fajnaj bonjfaenh. Yienghhaenx hix dwg guh hawj gou yawj, mboujgvaq de fak ndaej mizdi haenq, yiengjbaba. Gou mizdi mbouj naihfanz he, naeuz: “Dauqdaej baenzlawz la? Doxgaiq deng byawz dawz bae?” Daxboh gou daxmeh gou mbouj guhsing. “Sou cungj guh gijmaz saeh la?” Gou rongx hwnjdaeuj. Maj daengz baenzneix hung, gou baez daih’it yungh gij sing sang baenzneix caeuq daxboh daxmeh gou gangjvah. Seizneix gou mbouj dwg daeglwg gyoengqde, cix dwg boux gingjcaz ndeu.

  Gij vifung gou miz cozyung lo, daxboh daxmeh gou doeksaetyat, ca di laemx roengz gwnznamh bae, cijndei lauxlaux saedsaed gangj lo. Dwg daxboh gou gangj gonq, doeklaeng dwg daxmeh gou gangj. Dingq sat gij vah gyoengqde, gou ca di couh hozndat yaek dai bae.

  Mwh gou youq Yizgyangh sinhoj liebbyaij, cingq vih baenzlawz doiqfouq Cinz Lieng gyaeujdot seiz, daxboh gou caeuq daxmeh gou youq Mbanjdaepvan maez cungj guhdoj heuhfuh “goengsam ” ndeu, caeuq Cinz Lieng gyoengqvunz haenx youq gwnz Cuhmuzlangjmaj guhdoj ityiengh, gyoengqde yied doj yied saw, yied saw yied doj, mbouj miz cienz le, couh dawz gij doxgaiq ndaw ranz suenq baenz ngaenz bae guhdoj, sien dwg densigih, daxboh gou naeuz, mbouj yawj densi couh suenq lo, geij cib bi gaxgonq mbouj yawj densi, hix mbouj raen dai vunz! Ciep roengzdaeuj dwg danci, daxboh gou naeuz byaij roen byaij gvenq le, caij danci mbouj sibgvenq saek di, caiq baenzneix roengzbae couh haengjdingh baenz daep gawh lo; yienzhaeuh dwg aencibuh, baenz neix lwnz daengz daxmeh gou gangj lo, fanjcingq aencibuh hix mbouj miz maz yungh, ce youq ndaw ranz hix dwg dong dietfeiq ndeu, dawz bae at vuenh cienz luba; doeklaeng dwg aen mbonq, mwh densigih、danci、aencibuh saw bae le, lwgda daxboh daxmeh gou cungj cimyawj daengz aen mbonq sizmungswh neix, song boux de maqmuengh aen mbonq neix fazveih cozyung ndei, hingz dauqma doenghgij saw bae haenx, gyoengqde naemj gij cawjeiq aen mbonq, dwg aenvih aen mbonq deng moebbyuk, seiq diuz ga hwnj mbawfaex haenx lij youq, “ninz aen mbongq neix mbouj ndaej ha!” Daxboh gou baez haeb heuj, mbonq hix saw bae lo.

  “Ranzcawj” gyaq dohlahgih ndeu, couh rag bae gij gyadangq ranz gou. Song boux vunzguhnaz gaenxhong caj gou bae haenhndei haenx, youq mbouj nyinh mbouj rox seiz bienqbaenz boux ndojgej deng doj saw lo. Seizneix, gyoengqde maeuq youq henz ndang gou, lumj song boux vunz diegrog daeuj Yizgyangh guhdoj deng gou gaebdawz ityiengh.

  Ndawsim gou hoengvatvat liux, mbouj ndaej mbouj maeuq youq gwnznamh, byoq ok ndaek gaemz ndaek gaemz heiq, lumjnaeuz ngamqngamq buet le geij cib leix roen nei, baeg dwk cij miz cuengq heiq mbouj miz sup heiq.

  Gou mbouj nyienh ciepsouh gij yienhsaed yienghneix, daxboh gou daxmeh gou, gyoengqde dwgrengz baenz ciuhvunz, gungganq daeglwg bonjfaenh baenz boux gingjcaz rox sij sei ndeu, hawj boux gingjcaz rox sij sei neix gangj daengz gyoengqde seiz nyaenx mbouj ndaej song din ndwn cingq gingqlaex, seizneix…… Cedmeh de, gij gyadangq ranz gou youq gizlawz? “Byawz buen bae la?” Gou lienzdaemh cam geij coenz.

  Daxboh gou youh yaek fak fajnaj bonjfaenh. Danghnaeuz gou caiq cam de, de yaek fak fajnaj de doek roengz gwnznamh bae cijndaej. De seizneix baenzlawz yawj baenzlawz lumj Cinz Cangfeih daxboh Cinz Lieng (ciuq yienghneix daeuj yawj, gou caeuq Cinz Lieng couh bienqbaenz beixnuengx lo). Gou laengz dawz de, yienzhaeuh cung ok douranz.

  Gou gonqlaeng nyoengx hai douranz Mbanjdaepvan 20 ranzvunz, hainduj gou nyinhnaeuz densigih、danci、aencibuh、sizmungswh yaek okyienh youq 20 ranzvunz ndawde geij ranz, siengj mbouj daengz 20 ranzvunz neix caeuq ranz gou ityiengh, hoengqvatvat. Doxbeij daeuj yawj, doenghgij vunz saw bae gyadangq neix, beij daxboh gou swhyienz engqgya lai lo. Yawjraen cungj yienghceij neix le, gou hojsouh dangqmaz, gyoengqde foenfoen daeuj nai gou: “Ndaej hingz dauqma leu, vunz mbouj dwg ciuhvunz cungj boihseiz, gvaq mboengq ndeu mwngz caiq daeuj, baujcwng yiengz rim riengh cwz rim riengh.” Dingq gij vah gyoengqde, lumjnaeuz guhdoj deng saw mbouj dwg gyoengqde, cix dwg gou nei. Gou mbaet gaemz ienqheiq ndeu, deuz ok Mbanjdaepvan. Gou mbouj dauqma daengz ndaw baicuzsoj, cix dwg cigsoh buet bae daengz Cuhmuzlangjmaj. Ngoenzneix, gou aeu dawz sojmiz ienqheiq, cungj cuengq youq gwnz Cuhmuzlangjmaj.

  Mozdozceh gou hai ndaej vaiq raixcaix, lumjnaeuz bae guh hangh yinvu gaenjgip ndeu nei, gij vunz caeuq ci laengz youq baihnaj gou haenx foenfoen veq deuz, diuz namhfaenx raezrangrang ndeu, itcig rag daengz lajdin Cuhmuzlangjmaj.

  Gou diuq roengz ci, cung hwnj gwnz Cuhmuzlangjmaj bae, ngoenzneix gou aeu gaemh vunz, boux daih’it yaek gaemh couh dwg Cinz Lieng. Yienznaeuz de caeuq daxboh daxmeh gou guhdoj deng saw mbouj miz gijmaz gvanhaeh, gyoengqde raen gou coh gyoengqde cung gvaqdaeuj seiz, gyoengqde mbouj dawzhaeujsim saek di——Song bak mij seiz, gyoengqde mbouj dawzhaeujsim, saek bak mij seiz, gyoengqde mbouj dawzhaeujsim, 50 mij seiz gyoengqde hix mbouj dawzhaeujsim, gou daengz dangqnaj lo, gyoengqde hix mbouj dawzhaeujsim. Gyoengqde gaenbonj mbouj dawz gou dang baenz gienh saeh ndeu. Gou boux gingjcaz neix suenq dwg begbeg dang lo.

  Cinz Lieng cingq fat baiz, fajfwngz gou baez vad couh bungq doek gij baiz ndaw fwngz de. De doeksaetyat, coh gou hemq: “Mwngz yaek guh gijmaz?”

  “Guh gijmaz, gaeb mwngz!” Gou iet fwngz bae gaeb Cinz Lieng.

  Vunzlai sikhaek nauhnyaengnyaeng hwnjdaeuj.

  Gyoengqde mbouj ndojdeuz, cix dwg ndwn youq bangxhenz yawj nauhyied, lumjnaeuz gienh saeh neix caeuq gyoengqde mbouj miz gvanhaeh ityiengh.

  Cinz Lieng youq ndaw fwngz gou cukcak, doengzseiz daih sing hemq: “Cuengq gou, cuengq gou.” Gou rag de yiengq laj ndoi byaij, de mbouj haengj bae, got dawz gonj rin ndeu. Gou yungh rengz mbek gij fwngz de, song boux vunz couh doxniuj hwnjdaeuj, ringx youq gwnznamh, naenx vaih benq nywjheu gwnz Cuhmuzlangjmaj.

  “Cuengq gou! Cuengq gou!Cuengq gou!” Cinz Lieng lienzdaemh hemq sam sing.

  Gou mbouj cuengq de, dauqfanj yied got yied yungh rengz.

  “Mwngz cuengq mbouj cuengq?” “Mwngz cuengq mbouj cuengq?” “Mwngz cuengq mbouj cuengq?” De mizdi ciedmuengh he, ciedmuengh hix mbouj ndaej, ngoenzneix gou itdingh aeu gaemh de.

  “Ya——” Cinz Lieng aj bak, haeb gwnz mbaq gou, in dwk gou ca di hemq hwnjdaeuj lo.

  Gou hix siengj haeb de, hoeng gou mbouj ndaej haeb. Gou nyaenx indot yax buh de mbouj cuengq, gou siengj caj de yungh sat rengz ndang le, de couh lauxlaux saedsaed caeuq gou bae baicuzsoj.

  Youq duenh seizgan neix, gij heuj Cinz Lieng itcig mbouj soeng, gou roxnyinh gwnz mbaq gou cingq oklwed laeswdswd ne. Seizneix, gyoengq nyezrauh cibsam cibseiq bi haenx humx gvaqdaeuj. Gyoengqde yaengx sang fagcax lwenqmyanzmyanz. Gou yawjraen doengzseiz miz geij aen daengngoenz coh gou ciuq daeuj, gou cijndei cuengq Cinz Lieng, ndoj gvaq henz bae ……

  Doeklaeng

  Gou youq ndaw rug, duet roengz geubuh, giz deihfueng deng Cinz Lieng haeb haenx gawh hwnjdaeuj lo, geij aen riz heuj cungj dwg lwed.

  Gou sawqmwh ngeix daengz Cinz Lieng lij iq seiz gaenq deng duzma haeb gvaq, gipmuengz daek bat raemxsaw ndeu, aeu genj swiq gij riz heuj Cinz Lieng bae, baez dem baez, yienghneix lij mbouj cuengqsim, gou lij ra caxiq bae gvet riz heuj, “a!” Gou swenj hwnjdaeuj.

  Sojcangj Cinz Naijgvei dingqnyi gij sing hemq gou, daeuj roq aen dou gou.

  “Baenzlawz la?” De cam.

  Gou nyaenx indot dwk, at daemq singyaem, naeuz: “Mbouj miz saeh.” Cawzliux naeuz “mbouj miz saeh”, gou mbouj rox lij ndaej gangj gijmaz dem.

  (14 sat)

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部