当前位置: Sawcuengh > yiengh ndei Mbanjcuengh

Gij Dinfwngz Guh Ceijsa Lingzyinz

2020年09月17日    来源:广西民族报    作者:Maj Veiyungz comz hoiz    字号:[    ]

Hong lauzceij yaekaeu saeqsim goengfou laeg.

Vunzmbanj bae gwnz ndoi raemj aeu faexcuk ma.

Naezgiengh faexcuk gyaux ieng faexdiencoeng le yunghrengz gyaux yinz.

Daengx ranz vunz comz dwk buq faexcuk baenz diuz.

Dawz diuz faexcuk cuengq roengz cingj aeu raemxhoi cimq.

Mwh atdaenz caenx raemx yaek miz rengz cij ndaej.

Dab ceij atcaenx raemx ok liux le dwg yienghneix.

Faexcuk lauz hwnj swiq seuq le couh caij cauz.

Gwnz diegdangz dak rim ceijsa.

Mehmbwk hainduj giemj ceij bae dak lo.

Bouxsai caij doiq daem faexcuk baenz naezgiengh.

  Gij dinfwngz guh ceijsa Lingzyinz gag riuzcienz youq Lingzyinz Yen Lozlouz Cin Mbanj Loegyiuz, dwg gij dinfwngz seiqcib lai hoh Bouxgun dangdieg ciuh cienz ciuh haenx. De caeuq gij dinfwngz fapdoj guh ceij faexcuk gwnzbiengz geiq youq ndaw《Diengoeng Haihuq》gig doxlumj, dwg gij hwngfat fapguhceij ndaw seiq daih fatmingz.

  Lingzyinz Yen fwnraemx lairaeuh hix yinzrwd, gij dienheiq daegbied haenx gig habngamj faexcuk majhung. Moix bi ndwenseiq daengz ndwenngux, baenz buek faexcuk oiq couh deng bouxguhceij raemj roengzdaeuj, youh cimq roengz raemxhoi bae, cimq daengz cousou gvaq le, bouxguhceij couh hainduj guh hong lo.

  Gij dinfwngz guh ceijsa gig fukcab, daj faexcuk bienqbaenz ceij yaek aeu ginggvaq haujlai bouh, gij cwngzsi baumiz: Raemj faexcuk、cimq raemxhoi、swiq hoi ok、daem liuh、 caij cauz、 gya raemxvad、 lauz ceij、 dimz ceij、 giemj ceij、 dak hawq daengj, cienzbouh dwg aeu vunz guh. Daih’it, gij faexcuk yaek aeu raemxsaw ma dongjswiq, caiq doenggvaq caij cauz, daem baenz naezboengz bae. Gij fuengsik aeu vunz ma dajgiengh daegbied haenx hawj gij nyinz ndaw gienghceij baujlouz ndaej haemq ndei. Yienzhaeuh dawz gienghceij caeuq gij iengfaex diencoeng gya haeuj ndaw cingj bae gyaux yinz, gij yenzliuh guh ceij couh loengh ndei lo. Doeklaeng couh aeu aen gvaenghgyaq gwnzde miz yiemz faexcuk haenx bae ndaw cingj gienghceij raeng aeu gij nyinz fouz youq gwnzde haenx, guh baenz ceijmbaw mbaeq. Gyoengq gunghyinz raeng dwk miz gvilwd dangqmaz, yienghneix doenghgij nyinz couh ndaej baiz ndaej yinz. Gyoengqde youh dawz aen gvaenghgyaq fonj gvaqdaeuj, hawj gij ceij mbaeq loenq roengz gwnz benjceij bae, caenh raemhrex bouh hong neix, deq gij ceij mbaeq daeb dwk ca mbouj geijlai, couh youq gwnzde dimz gepbenjfaex roxnaeuz gepbenjrin. Gwnzde dimz dwk naek le, couh ndaej caenx gij raemx okdaeuj. Deq raemx caenx ok liux le, couh baez mbaw baez mbaw giemj mbawceij hwnjdaeuj. Gij ceijsa ngamq guh baenz neix henjoiq henjoiq, miz caetcib ngeih lizmij raez, ngeihcib sam lizmij gvangq, gij naz de yinz raixcaix, lumhlax hwnjbae lwenqdwtdwt, unqnemq cix ndaej naih muz, aeu bae sij saw, gij maeg de hix mbouj iemq daeuq daej, diemj feiz coemh ne hoenz noix daeuh hix noix, vunz aeu daeuj guh ceijei ceijcienz caeqbaiq lai.

  Bi 2012, gij hanghmoeg dinfwngz guh ceijsa Lingzyinz ndaej senj haeuj buek daihseiq swcigih feihvuzciz vwnzva yizcanj baujhoh mingzloeg.

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部