当前位置: Sawcuengh > faenzcieng hagseng

Boihseiz Gaujsi

2020年09月17日    来源:广西民族报    字号:[    ]

  Lingz hwnjdangz yiengj lo, lauxsae umj dab sigienj he haeuj gyausiz daeuj. Ndaw gyausiz bonjlaiz cauzhuhu haenx sawqmwh dingh roengzdaeuj. Miz mbangj doengzhag loengh gonjbit swhgeij, miz mbangj doengzhag dinghdingh naengh youq, daihgya cungj mbouj gangj vah lo.

  Ndaw sim gou lumj miz duzdouq he yat hwnj yat roengz, sim gig mbouj onj, lau gaujsi daiq naek lai. Sigienj fat roengzdaeuj lo, gyoengq doengzhag hainduj biengj yawj sigienj. Gou yawj baihnaj geij daez, mbouj nanz geijlai, couh hainduj dap daez.

  Ndaw gyausiz caemrwdrwd, cij dingqnyi sing bit raiz “caca”. Laux- sae naengh youq gwnz gyangjdaiz, cimyawj gyoengq doengzhag. Gou gig vaiq couh guh sat daezdienzhoengq, hainduj guh daezsenjcwz. Baihnaj sam daez gig yungzheih. Daez daih- seiq—— nanzdoh couh lumj naengh hojcen nei, fwt mbin hwnj gwnzmbwn bae. Mwhde, lauxsae bae bangunghsiz lo, ndaw ban hainduj gangjvah sebseb, sing gangj yied daeuj yied hung. Ndaw gyausiz, geij aen feihgihceij mbin bae mbin dauq. Lij miz vunz aeu ceij gienj hwnjdaeuj, youq ndaw ceijgienj cuengq aen giuzceij iq he, yungh rengz boq. Giuzceij couh lumj yienzbauq nei mbin okbae.

  Ndaw gyausiz cauzhuhu, gou hix mbouj miz sim caiq dap daez lo, hixnaengz naengh youq yawj gyoengq doengzhag guh’angq. Couh youq seizde, rog cueng mbin haeuj song duz rwi. Miz mbangj vunz ndoj bae ndoj dauq, lij miz mbangj vunz gyajcang bae gaeb, hoeng duzrwi mbin gyawj couh deuz lo.

  Lauxsae dauqma lo, ndaw ban youh dinghyubyub, cijmiz song duz rwi gongz “ww”. Mbouj rox dwg feihgihceij boux lawz mbin dwk, cingq ngamj deng lauxsae yawjraen. Cij raen feihgihceij mbouj gaenj mbouj menh mbin ok rog cueng, doek roengzdaeuj lo. Ginggvaq saemjcam, lauxsae hoz- ndat gaeb ok song boux “vunzfamh”, gaeu faensoq song de bae.

  Gou ngaem gyaeuj laebdaeb dap daez. Sawqmwh, gou youh bungz- daengz diuz daez nanz dap he. Gou yawj seiqhenz, miz geij boux doengz- hag hix dingz bit roengzdaeuj, cijmiz boux hagsib ak nyinhcaen dap daez. Miz mbangj doengzhag gaenq hainduj luenh dap lo. Miz mbangj yungh fuengfap gipgaeu dap daez—— mbaw ceij he dwg “A”, mbaw he dwg “B”, mbaw he dwg “C”, mbaw he dwg “D”, gip daengz mbaw lawz couh dienz mbaw de. Gou hix ciuq yienghde guh.

  Gou gip daengz “A”! Ai, deng mbouj deng cijndei dingq mbwn youz mingh lo, caen maqmuengh baihlaeng caiq mbouj miz gij daez yienghneix lo, gvaiq couh gvaiq swhgeij bingzseiz mbouj roengzrengz hagsib. Mwh gou yaek raiz sat sigienj, gou da liuq doengz daiz gou mbat he, de cij ngamq guh sat yieb daihsam. Sawqmwh, nyeuq ceij he mbin daengz gwnz daiz gou, gou hai daeuj yawj, dwg bouxwnq raiz “daez doeklaeng baenzlawz guh?” Gou cij mbouj bang mwngz ne, neix dwg guhgyaj bw! Gou sik mbaw ceij de bae, yawjyawj diuzdaez doeklaeng, saedcaih dwg miz di nanz. Gou siengj ok song aen dapanq, hoeng dapanq deng cij miz aen ndeu. Sikhaek couh yaek roengzdangz lo, gou simgip raix- caix. Mbouj ndaej ngaiznyed lo, gou dienz aen dapanq gou nyinhnaeuz deng haenx hwnjbae, gipgip muengz- muengz gyau gienj lo.

  Ma daengz ranz, gou nyapsaeb- saeb. Daxmeh nai gou: “Saekseiz gauj mbouj ndei mbouj youqgaenj, caen- cingq youqgaenj haenx dwg gauj mbouj ndei le lij mbouj rox baenzlawz gauj mbouj ndei.” Gou gyaengj mbat he, sikhaek dawz gobwnj caeuq bitgeiq gaxgonq geiq haenx okdaeuj. Gou dauqdaej rox lo. Gou lij yaek youq bingzseiz gyaboix roengzrengz doegsaw. Mwh yaek gaujsi cij yawj saw, dwg gauj mbouj ndei bw.

  (seiq nienzgaep Vangz Cujhanz)

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部