当前位置: Sawcuengh > faenzcieng fanhoiz

Geiq Liebbyaij(13)

2020年09月17日    来源:广西民族报    作者:Lij Yozyez sij Luz Yaujli hoiz    字号:[    ]

  De mbouj rox, gaxgonq, Cinz Lieng daiq gyoengq nyezrauh neix daj gizgyae yawj aen ranz de, naeuz: “Yawj, haenx dwg ranz Vangz Ci, dwg gou bang de hingz ngaenz cij guhbaenz, gou yied daeuj yied dwgcaengz Vangz Ci lo, de lumj boux caizcawj ndeu nei, baengh gou ciengx mingh.” Seizneix, ndaek Vangz Ci baengh Cinz Lieng “ciengx mingh” neix unq roengzdaeuj lo.

  Cinz Lieng naeuz: “Daj ngoenzneix hwnj, raeuz gag boux gag guhdoj, aen ranz mwngz, gou cix mbouj bae faen saek conq.” Gangj sat, daiq gyoengq nyezrauh daekeiq vauvau byaij deuz lo.

  Bineix, de cek bae aen ranzgaeuq daxgoeng Cinz Mouswnh louz roengzdaeuj haenx hwnq ranz moq lo. Bineix, daxboh de Cinz Cangfeih daengx ndang bingh indot dauqma daengz Yizgyangh, daxboh raen daeglwg de gaenq majhung baenz boux nyezrauh daengx naj maj nohvang、lwgda yap yakrwix ndeu, couh gvih roengzdaeuj, got dawz song cik ga daeglwg daejnga’nga——Daj seizhaenx hwnj, de couh baenz boux vunzbingh daezgonq aeu daeglwg ciengx ndeu, hawj Du Vaz yiemq cienzdoj Vangz Ci cix bae Gvangjdungh dajgoeng、deng ngauq ciensuijniz Gvangjdungh dub deng cik ga ndeu haenx hozhaenz raixcaix.

  Cik ga ndeu deng raek le, Du Vaz youq Yizgyangh roengz cienzdoj coengzlaiz mbouj mauh- gvaq song maenz ngaenz, caiqlix cij caeuq gyoengq bouxlaux haj roekcib bi haenx guhdoj, de caengz laux nyieg gonq, siliengz dangqmaz. Miz boux suenqmingh ndeu doiq Du Vaz naeuz: “Diuz mingh mwngz bonjlaiz couh noix cik ga ndeu, danghnaeuz mwngz mbouj bae Gvangjdungh, ga ciuqyiengh raek.” Ndawsim Du Vaz sikhaek yienh’ok fouq lwgda Cinz Lieng yawj bonjfaenh seiz geijlai yakrwix, de naemj, danghnaeuz bonjfaenh youq Yizgyangh deng ga raek, haengjdingh caeuq Cinz Lieng mizgven. Bouxsuenqmingh lij doiq Du Vaz naeuz: “Ga raek le ndei, gangjmingz giz gumzgamx neix mwngz hamj gvaqbae lo, hamj gvaq giz gumzgamx neix le, mwngz haengjdingh ndaej souhyienz bak bi.

  Gvendaengz daxboh bonjfaenh Cinz Cangfeih, Cinz Lieng doiq gyoengq nyezrauh haenx naeuz: “Gou siengj seizlawz gyaep de ok dou couh seizlawz gyaep de okdou, de mbouj miz saekdi banhfap.” Gou vihmaz nyaenx mbouj ndaej yaek gangjgangj gij goj Cinz Lieng, dwg siengj gangjmingz Cinz Lieng bienqbaenz ndaek dojgeq ndeu dwg mbwndingh, couh lumj Du Va ndaw mingh de mbwndingh cik ga ndeu deng raek ityiengh, mbouj miz vunz ndaej laengzlanz.

  Mboujdan Cinz Lieng, gij vunz gwnz Cuhmuz- langjmaj cungj dwg baenzneix.

  Doeklaeng gou vihmaz famh loek, dwg aenvih gou siengj laengzlanz gyoengqde bienqbaenz bouxdoj. Neix ca mbouj geijlai caeuq doegsaw seiz gagnyinh gij byauhyij ndaw diengzhaex dwg gou bonjfaenh sij haenx ityiengh dwgriu.

  Gvendaengz Di Vwndiz Sei

  Dangguh boux yozyenz gingjyau sij ndaej sei dandog ndeu, daeujdaengz Yizgyangh le gou mbouj sij gvaq saek hot sei, dwg aenvih gou caengz loengh cingcuj haujlai saehcingz, beijlumj naeuz: Dangguh canghsei lajmbanj ndeu, youq najdoiq gij diegdeih Yizgyangh yienghneix seiz, de wnggai baenzlawz ngon ciengq? Youq najdoiq gij nyezrauh lumj Cinz Lieng、daxboh lumj Cinz Cangfeih yienghneix seiz, ndaw lwgda de, lij caeng ndaej raemxda lwi? Youq najdoiq Yizgyangh gizdieg cij sengmaj bouxdoj mbouj sengmaj haeuxgwn seiz, de wnggai baenzlawz cijndaej youq ndawsim laebbaenz aen ukgyaeuj giengzak moq ndeu, daeuj hawj bonjfaenh lohnaemj sij sei okdaeuj lumj raemxmboq nei? Doenghgij vwndiz yienghneix aiq miz di mbouj baenz, hoeng seizhaenx, gij vwndiz yienghneix gauxca gou ninz mbouj ndaek liux.

  Gou maij sij sei lai lo, hoeng youq Yizgyangh, gij seieiq cungj siusaet liux, swngfwi hwnjdaeuj cij mbouj gvaq dwg gij fugfauz seieiq, gyoengqde youq dangqnaj gou aen dem aen okyienh youh aen dem aen buqdek, cij miz gij singcauz gwnz Cuhmuzlangjmaj sing sang gvaq sing.

  Cedmeh de mbouj sij couh mbouj sij, mbaet di bitmaeg ndeu, bae haenhndei daxboh daxmeh gou. Hoeng mbouj baenz lo, bohmeh caj gou bae haenhndei haenx seizneix hix oksaeh lo.

  Gou cingq siengj bae bauqnaeuz Cinz Naijgvei nyi gij saehcingz gou caeuq Cinz Lieng youq gwnz Cuhmuzlangjmaj doxraen haenx, Cinz Naijgvei fajnaj heumbit youq gwnz gai ra raen gou, naeuz: “Mwngz vaiqdi baema, ranz mwngz oksaeh lo.”

  Gou naeuz:“Ranz gou baenzlawz la?” De ngauzngauz gyaeuj, danq gaemz heiq ndeu, naeuz: “Mwngz baema couh rox lo.”

  Gou hai gyaq mozdozceh samloek coh Mbanj- daepvan ganj bae, itloh ndawsim cai ranz gou dauqdaej ok gijmaz saeh. Gou cai daihgaiq dwg baenzneix:

  1.Daxboh gou roxnaeuz daxmeh gou deng caz ok daep foeg.

  2.Daxboh gou bae langh vaiz mbouj siujsim deng doek roengz lajbya.

  3.Daxmeh gou bae raemj fwnz deng ut sieng hwet lo.

  4.Ranz deng feiz coemh lo.

  5.Ndw ranz deng caeg haeujbae lo.

  Hoeng gou ngeix daengz gij yienghceij Cinz Naijgvei baenzneix fouznaih, gij baihgwnz cai haenx youh deng gou doifan lo. Gou faensik gij saeknaj Cinz Naijgvei, cugciemh roxnyinh daengz daxboh daxmeh gou guh le gijmaz saeh mbouj ndaej hawj vunz rox, dwg mbouj dwg daxboh gou famh gij loek cozfungh fuengmienh?

  Bung sing ndeu, gyaq mozdozceh gou naenx youq gwnz gonj rin ndeu, ca di fan roengz ndaw naz bae.

  Mwh gyaq mozdozceh samloek gou gienj namhfaenx dingz youq bakdou ranz, daxboh daxmeh gou maeuq youq bakdou ranz, byoemgyaeuj nyungqnyatnyat, lwgda song boux de gig vaiq liuq yawj gou baez ndeu, youh laulili ndojdeuz.

  Gou hwnjbae rex gyoengqde. Sien rex daxmeh gou, caiq rex daxboh gou. Rex daxboh gou seiz, daxmeh gou youh maeuq roengzbae lo. Raen daxmeh gou maeuq roengzbae, daxboh gou youh mbouj ndei eiqsei ndwn dwk, hix gaenriengz maeuq roengzbae. Dauqdaej vih gijmaz saeh sawj bohmeh gou mbouj nyienh ndwn hwnjdaeuj? Gou ngeizvaeg nyoengx hai dou ranz.

  Ranz gou hoengqvatvat. Densigih mbouj miz lo, danci mbouj miz lo, aencibuh mbouj miz lo, mbonq hix mbouj miz lo. Gou vihmaz haeujsim geij yiengh doxgaiq neix, dwg aenvih doenghgij doxgaiq neix dwg gou dang gingjcaz le cawx hawj bohmeh. Ceiq caeux dwg cawx densigih, gyanghwnz Mbanjdaepvan raezrangrang, gou siengj hawj bohmeh gou yawj densi haeujninz, ndigah gou sien cawx densigih; yienzhaeuh dwg danci, reih haeuxyangz ranz gou ceiq gyae aeu byaij sam goengleix, miz danci le, daxboh gou caeuq daxmeh gou couh mbouj yungh byaij roen baenz gyae lo; ciep roengzdaeuj dwg aencibuh, neix dwg gij huqbengz dandog ranz gou, dwg cawx hawj daxmeh gou yawj, de caeuq daxboh gou baenzgya seiz couh siengj cawx aencibuh ndeu, seizhaenx, gij singyaem rumz ci mbawfaex, de cungj nyinhnaeuz dwg singyaem aencibuh, yienznaeuz seizneix mbouj miz geijlai yungh, couh suenq saedyienh gij loqsiengj 20 bi gonq de ba, dangq bang daxboh gou bouj hawj de aen haedfwngz gietvaen ndeu ba; doeklaeng dwg cawx mbonq, aen mbonq daxboh gou caeuq daxmeh gou ninz le 20 bi, deng moebbyuk haeb ndaej cij lw aen byukhoengq ndeu lo, seiq diuz ga yungh mbaenqfaex lij maj mbawfaex daeuj dingj dwk. Cawx doenghgij doxgaiq neix le, gou itcig miznaj daengz seizneix.

  Seizneix, doenghgij doxgaiq neix mbouj raen lo. ——Conghhoz daxboh gou rongx ok raq singdaej ndeu, mbouj dwg caensim siengj daej, baez dingq couh rox dwg cienmonz daej hawj gou yawj. Boh ya boh, mwngz seizlawz hag rox yienjheiq lo.

  Gij singdaej yienghneix hawj gou giendingh le gij yawjfap daxboh daxmeh gou famh le gijmaz loek. Henzgyawj ranz gou comz dwk cib lai boux vunz yawj nauhyied, gyoengqde cingq yawj gij heiqndei ranz gou. Gou fwngz ndeu rag daxboh gou fwngz ndeu rag daxmeh gou haeuj ranz bae. Gou gven dou hwnjdaeuj.

  (13)

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部