当前位置: Sawcuengh > faenzcieng cauhdaeuz

Ciq Ngaenz

2020年09月17日    来源:广西民族报    作者:Vangz Gveiyangh / 黄桂香    字号:[    ]

  Siujfanz mbouj dwg gij hagseng ndaw ban gou, hoeng caeuq gou gig ndei.

  Hainduj dou cungj mbouj roxnaj, miz baez he gangj goq, de haemq maij dingq gou hwnjdangz, ndigah roengz- dangz le daegdaengq daeuj ra gou gangj vah, caemhcaiq aeu gij hauhmax gou.

  Hoeng Siujfanz yinxhwnj gou louzsim, dwg aenvih de ciengzseiz bae bangunghsiz “guh hek”, song sam ngoenz couh deng banhcujyin cingj daeuj bangunghsiz. De dwg boux ngwn he, caih banhcujyin de ndei gangj rwix gangj, de mbouj siengj haibak couhdwg mbouj gangj saek coenz, banhcujyin de ciengz deng de gik ndaej gangj mbouj ok vah daeuj.

  Miz ngoenz ndeu, Siujfanz gingqyienz doengh fwngz dub boux lwgsai beij de lij sang hubcap ndeu, aen ndaeng lwgsai lae lwed mbouj dingz, gwnz naj lij miz giz sieng hung’iq dem. Daxmeh lwgsai huj- dengdeng ganj daengz hagdangz, iugouz Siujfanz boiz 300 maenz cienzyw. Daxmeh Siujfanz youq mwh de lij iq couh gvaqseiq lo, daxboh youq baihrog dajgoeng, de caeuq daxgoeng daxbuz song bouxlaux gvaq saedceij ndwi. Baenzneix banh- cujyin de cij ndei cingj daxgoeng de gaenq ndaej 80 lai bi haenx daeuj hagdangz. Daxgoeng Siujfanz rox gienh saeh neix le, hozndat ndaej gangj mbouj ok vah daeuj, fid fwngz couh deuz lo.

  Mbouj miz banhfap, Siujfanz daj dienhvah hawj daxboh de, siengj mbouj daengz daxboh de baez ndaej- nyi hix hozndat ndaej gven’gvak dienhvah bae. Mbatneix, Siujfanz simvueng lo, hoeng de lij caemding naeuz:“Cienz gou itdingh hawj, hawj gou di seizgan.” Ginggvaq banhcujyin naihsim hezdiuz, daxmeh lwgsai dauqdaej cengqgengz doengzeiq lo.

  Gou dingqnyi gienh saeh neix le, daegdaengq ra Siujfanz, cam de baenzlawz guh. Siujfanz naeuz:“Gou menhmenh gip bingsuliu rom baenz boengj bae gai canh cienz, maenz ngaenz he maenz ngaenz he rom.” Gou roxnyinh de gangj vah mbouj miz rengz geijlai lo, sing hix mbouj lumj gaxgonq baenzneix hung.

  “Mwngz gamj rapdawz cwzyin, di neix lauxsae aeu haenh mwngz. Hoeng, gij beizheiq mwngz gvaqlaeng aeu gaij, mbouj ndaej gangj mbouj hab’eiq couh doenghfwngz.” Gangj sat, gou daj ndaw daeh dawz ok 300 maenz ngaenz hawj de, naeuz:“Gij cienz neix lauxsae sien ciq hawj mwngz, mwngz baezlaeng menhmenh boiz gou couh ndaej lo.”

  Aiq de liuh mbouj daengz gou rox ciq cienz hawj de, de doeksaet ngawh youq gizde, doeklaeng sing iq naeuz:“Gyo’mbaiq Vangz lauxsae, gij cienz neix gou itdingh boiz mwngz!”

  Aenvih gienh saeh neix, dou doxliz gyawj le haujlai, gou seizseiz haeujsim de hag ndaej baenzlawz yiengh, de hix ciengzseiz ra gou gangjgoj.

  Miz ngoenz ndeu, banhcujyin de angqvauvau naeuz gou nyi, ngoenz- lwenz cuengqhag le, gyoengq doengz- hag cungj baema lo, de gingqyienz raen Siujfanz boux dog nyinhcaen baet gyausiz, caen roxsoq lai lo. Neix dwg banhcujyin de baez daih’it youq ndaw bangunghsiz haenh de bw!

  Gou dawz gij vah banhcujyin de gangj hawj Siujfanz dingq caez, caemhcaiq doiq de daengj mehfwngz. De miz di najmong naeuz:“Vangz lauxsae mwngz baenzneix haeujsim gou, gou hix wnggai guh ndei di, mbouj hawj mwngz vih gou yousim lai!”

  Gou caen yawjraen maqmuengh dahraix, baez he haenh, Siujfanz couh ndaej gujli, doeklaeng de menhmenh gaijndei, mbouj luenh caeuq doengz- hag doxceng doxmoeb lo. Siujfanz miz cinbu, gyoengqdou guh lauxsae cungj yawj youq ndaw da, ndawsim van lumj gwn dangzrwi nei.

  Ngoenzde ciet lauxsae, Siujfanz daegdaengq soengq mbaw hohgaj caeuq fung saenq ndeu hawj gou, gou sim’angq fouzbeij. Gwnz hohgaj sij miz coenz vah neix ndeu——“Youq ndawsim gou, mwngz couh lumj daxmeh gou nei, cingj saenq gou, doeklaeng gou itdingh mbouj hawj mwngz saetmuengh.” Gaxgonq de lij dwg boux lwgnyez manz, seizneix gingqyienz gangj ok gij vah yienghneix daeuj, ndawsim gou fwt roxnyinh ndawsim raeujrubrub.

  Gou ngeix: Gawqyienz ndaw hohgaj sij miz vah lo, baenzneix ndaw byuksaenq wnggai mbouj dwg sij miz saenq hawj gou luba, mbouj rox miz maz youq ndaw. Gou yaengyaeng hai byuksaenq, ndawde dwg dab ngaenz- lingz ndeu, cingqngamj dwg 300 maenz.

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部