当前位置: Sawcuengh > faenzcieng cauhdaeuz

Gienq Lwg Bae Doegsaw

2020年09月17日    来源:广西民族报    作者:Vangz Civeij / 黄志伟    字号:[    ]

  Meh:

  Ciengx lwg baenz lai geq,

  Mbouj rox meh sinhoj.

  Meh ngoenzngoenz hwnj bo,

  Mbouj rox ngeix aencingz.

  Meh:

  Lwg ngoenzngoenz youq ranz,

  Gwn van caiq gwn rang.

  Noh cawj daengz ndaw banz,

  Lij damz gwn mbouj feih.

  Lwg:

  Lwg ndaej 15 bei(bi),

  Rox ngeix daengz bohmeh.

  Seizneix lwg caengz geq,

  Deq bauqaen lij caeux.

  Meh:

  Lauxsae boq aen sauq,

  Meh dauq ranz cix daej.

  Ranzhag lwg mbouj bae,

  Meh daej lumj fwn roengz.

  Lwg:

  Lwg mbouj bae doegsaw,

  Ok haw caemh mbouj loek.

  Lwg ra ngaenz guh goek,

  Boek ndang guh gaicawx.

  Meh:

  Duz roeg ngamq hwnj bwn,

  Lij caengz dumh aen hwet.

  Roeg iq mbouj miz fwed,

  Ndaej buet geijlai nanz?

  Lwg:

  Ngeix bae daengz ranzhag,

  Lumj vunzbag gvaq ngoenz.

  Aen ukgyaeuj mbouj doeng,

  Loeng yungh cienz bohmeh.

  Meh:

  Meh mbouj ndaej doegsaw,

  Ok haw deng vunz lox.

  Cawx song gaen faen ho,

  Vunz lox gwn geij liengz.

  Lwg:

  Raen meh gangj yienghneix,

  Ngeix daengz sim couh diuq.

  Lwg mbouj rox suenq ciuh,

  Liuh langh mbouj doegsaw.

  Meh:

  Cihsaw dij lumj gim,

  Sim gou in daengx ciuh.

  Hai daeng le sim diuq,

  Da liuq saw mbouj rox.

  Lwg:

  Geij ngoenz raen meh daej,

  Simsaeh naek lailai.

  Cungj dwg lwg mbouj gvai,

  Haih hawj meh simfanz.

  Meh:

  Meh gangj lwg aeu dingq,

  Itdingh bae doegsaw.

  Yienghyiengh geiq youq ndaw,

  Ngoenzlawz bae ranzhag.

  Lwg:

  Bohmeh sou cuengqsim,

  Gou rim geiz couh dauq.

  3 bi gou gauhgauj,

  Bauqheij daengz ndawranz.

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部