当前位置: Sawcuengh > faenzcieng fanhoiz

Geiq Liebbyaij(12)

2020年09月17日    来源:广西民族报    作者:Lij Yozyez sij Luz Yaujli hoiz    字号:[    ]

  Mwh Diuqmeuz yawjraen boux nyezrauh yakyawj neix, sikhaek couh maij de lo. Danghnaeuz ciuq gij gonqlaeng hag dwk mazciengq daeuj baiz, Cinz Lieng ndaej heuh de guh goengsae. Ndigah Diuqmeuz doiq Cinz Lieng naeuz: “Mwngz ndaej heuh gou guh goengsae.” Cinz Lieng heuh Diuqmeuz coenz “goengsae” le, Diuqmeuz couh daiq gyoengqde bae Roen Hungzsingh gwn nohma naengbot.

  Couh dwg youq gwn nohma seiz, Cinz Lieng cij rox vihmaz Diuqmeuz heuh gyoengqde daeuj Liujcouh. Diuqmeuz seizneix dwg bouxdoj “Mbanjfeihcouh” mizmingz, mboengqneix saw lai hingz noix, de dingqnyi vunz naeuz, Vangz Ci youq Yizgyangh guhdoj ndaej hoenghhwd dangqmaz, sou boux lwgsae ndeu, lij hwnq ndaej ranz moq, couh heuh Vangz Ci daeuj Liujcouh. “Vuenhvuenh seizheiq, Yazgauh caeuq Maxdau mboengqneix iuseiq lai lo.” Diuqmeuz naeuz.

  Yazgauh caeuq Maxdau dwg gij vunzhong sizbinjcangj, gyangngoenz guh bingj, gyanghaemh guhdoj, aenvih hwnjban seiz sim mbouj youq ndang, vihneix gij bingj gyoengqde cauhguh haenx ciengzseiz cab miz byoemgyaeuj、ribfwngz、duz- nyungz daengj, yienghneix mbouj suenq, lij ciengzseiz lauqhong, doeklaeng song boux cungj deng gunghcangj haicawz.

  Seizneix, Diuqmeuz deng gyoengqde hingz ndaej mbouj miz saekdi beizheiq bae, couh siengj daengz Vangz Ci.

  Vangz Ci mizdi hojguh, Vangz Ci naeuz: “Dou cij rox dwk mazciengq, dwkbej cij rox dwk ‘ceng sang’youz’ caeuq ‘cib diemj buenq’, gijyawz cungj mbouj rox.”

  Diuqmeuz naeuz: “Liujcouh seizneix riuzhengz doj hung’iq, cij fat mbaw bej ndeu, gij baiz byawz hung, byawz couh hingz, yienznaeuz genjdanh raixcaix, cawzliux seizheiq le, suijbingz cienzbouh daejyienh youq swiq baiz, swiq baiz itdingh aeu da raeh fwngz riengj, itdingh aeu dawz baiz swiq youq gizdieg doiq bonjfaenh mizleih haenx, caemhcaiq geiq ndei gijmaz baiz youq gizlawz.”

  Cinz Lieng cingq ndaek gaemz ndaek gaemz gwn nohma, de sikhaek geiqmaenh “da raeh fwngz riengj” gawq neix, ma daengz Yizgyangh le, de baez dem baez bae yungh.

  Gwn sat nohma, Diuqmeuz daiq gyoengqde daengz Feihngoz Lijse, hai aen fuengz ndeu, son Vangz Ci caeuq Cinz Lieng gij fapgiuj swiq baiz caeuq geiq baiz.

  De naeuz: “Gou cujyau dwg seizheiq mbouj ndei, gangj daengz swiq baiz caeuq geiq baiz, Yazgauh caeuq Maxdau gaenbonj beij mbouj gvaq gou, mboengqneix doxdaeuj, gou itcig naemj aen vwndiz neix, gou vihmaz saw gyoengqde? Aiq dwg gij fapgiuj gou ndei lai, gijmaz cungj yawj ndaej cingcuj raixcaix, gwnz seiqgyaiq mboujguenj dwg gijmaz saeh, yawj ndaej cingcuj lai dauqfanj mbouj ndei, guhdoj hix ityiengh, wnggai youz mbwnlaux daeuj gaemguenj seiz couh youz mbwnlaux daeuj guenj, wnggai youz fapgiuj gaemguenj seiz couh youz fapgiuj daeuj guenj, caeuq Yazgauh dem Maxdau guhdoj, mbouj ndaej baengh fapgiuj gvaqbouh, aeu baengh gij rengzlig saenzmaed, gou vihmaz heuh sou daeuj, dwg aenvih doiq gyoengqde daeuj gangj, sou dwg saenzmaed, dwg laegluemx mbouj raen daej, gou baujcwng gyoengqde raen sou seiz, ndawsim itdingh saenzded, roengz cienzdoj seiz dawz mbouj cinj.”

  Dingq gij vah Diuqmeuz le, Vangz Ci caeuq Cinz Lieng vuenheij ndaej conghbwn daengx ndang cungj mbehai liux, daegbied dwg Cinz Lieng, de doq ngeixnaemj gij vah Diuqmeuz, doq hag gij yienghceij Diuqmeuz, baez dem baez swiq baiz、geiq baiz.

  Mwh gij sing gyaen Diuqmeuz caeuq Vangz Ci yiengj hwnjdaeuj, Cinz Lieng lij youq gizhaenx naihhaemz dwk lienhhag. Doeklaeng Diuqmeuz doiq Vangz Ci naeuz: “Lwg ndai neix, daengzcog maenh’ak bw.” Lienhhag song ngoenz le, Diuqmeuz daiq Vangz Ci caeuq Cinz Lieng daeujdaengz “Mbanjfeihcouh”.

  Diuqmeuz naeuz: “Sou cij guenj dwkbej, gaej caeuq gyoengqde gangjvah, hix gaej yawj lwgda gyoengqde, mboujguenj gyoengqde baenzlawz dauq gij vah sou, sou cungj gaej oksing, aeu guh daengz gwnz naj mbouj miz saek di biujcingz, couhdwg simhaw yaek dai hix gaej biujyienh youq gwnz naj. Lij miz, fajfwngz sou cawzliux swiq baiz、lumh baiz、roengz cienzdoj le, aeu lauxlaux saedsaed cuengq youq gwnz daiz, gaej doengh saek di, ciengeiz gaej lumh lajhangz、gvet conghndaeng、yaek rwz, Maxdau caeuq Yazgauh daj gijneix couh yawj ndaej ok gij simleix doiqfwngz.

  Vangz Ci ngauzngauz gyaeuj naeuz:“Diuq- meuz, dou youq Yizgyangh guhdoj seiz, gizlawz naemj baenzlai, sou mbouj doengz, sou caencingq dawz guhdoj dangbaenz gienh saeh ndeu daeuj guh.”

  Cinz Lieng naeuz: “Dauqma le, raeuz hix aeu dawz gijneix dangbaenz gienh saeh ndeu daeuj guh.”

  Diuqmeuz naeuz: “Dangbaenz gienh saeh ndeu daeuj guh lij mbouj gaeuq, lij dangbaenz gienh daihsaeh ndeu daeuj guh cijbaenz.” Gij yunghsim Diuqmeuz yinxhwnj yaugoj ndei raixcaix.Najdoiq Yazgauh caeuq Maxdau, de sien hawj Cinz Lieng hwnjciengz, Cinz Lieng swiq baiz seiz fwngz miz di saenz, Diuqmeuz faj fwngz ndeu couh dap youq gwnz mbaq de. Cinz Lieng roxnyinh daengz fajfwngz Diuqmeuz sanqfat ok rengzndat, cungj rengzndat neix sawj de sim’onj roengzdaeuj, menhmenh haeuj daengz ndaw goksaek bae. De ciuq Diuqmeuz son yienghhaenx guh, mbouj caeuq Yazgauh nem Maxdau gangj vah, mbouj yawj Yazgauh caeuq Maxdau saek baez, song fwngz lauxlaux saedsaed cuengq youq gwnz daiz, doengh hix mbouj doengh saekdi, gij baijdaeuz de mauhgvaq gij nienzgeij bonjfaenh, hawj Yazgauh caeuq Maxdau loengh mbouj cingcuj, roengz cienzdoj seiz ngeizvaeg mboujdingh, gig vaiq simheiq couh luemh bae, doeklaeng Cinz Lieng ndaej hingz caez.

  Baez bae Liujcouh neix, hawj Cinz Lieng yaenqsiengq ceiq laeg couh dwg fajfwngz Diuqmeuz dap youq gwnz mbaq de, duenh seizgan gig raez ndeu, Cinz Lieng itcig roxnyinh daengz fajfwngz neix mizyouq, de dap youq gwnz mbaq bonjfaenh, raeujrubrub, mbouj liz bonjfaenh saek seiz. Couh dwg youq doeklaeng Diuqmeuz deng vunz ndaemq cax ndeu, gveng roengz laj Giuzliujgyangh bae le, Cinz Lieng ciuqyiengh miz cungj roxnyinh neix. Daiq dwk cungj roxnyinh neix, Cinz Lieng caeuq Vangz Ci dauqma daengz Yizgyangh.

  Daj seizneix hwnj, cungj fuengfap guhdoj moq ndeu couh youq Yizgyangh riuzhengz lo. Gij ginglig Vangz Ci caeuq Cinz Lieng youq Liujcouh haenx, hix cienz doh Yizgyangh gak dieg, songde bienq- baenz vunz Yizgyangh raen seiqmienh ceiq caeux, ndaejdaengz haujlai vunz hozhaenz, daegbied dwg gyoengq nyezrauh cibngeih cibsam bi ngamqngamq mbouj hwnjhag haenx, ciengzseiz gaenriengz gyoengqde, gienj hwnj raq dem raq namhfaenx. Youq dangqnaj gyoengq nyezrauh neix, Vangz Ci caeuq Cinz Lieng cungj daegdaengq ciuqei Diuqmeuz, ciuqei de gangjvah, ciuqei gij yienghceij de ok baiz, sawj gyoengq nyezrauh neix roxnyinh Yizgyangh doengzseiz mizyouq boux hung boux iq song boux Diuqmeuz.

  Haidaeuz Vangz Ci mbouj roxnyinh neix miz gijmaz mbouj deng, hoeng mwh de nyinhrox daengz Cinz Lieng ciuqei Diuqmeuz lauheiq mbouj dwg gienh saeh ndei ndeu gaenq nguh lo, de mbouj rox gij diegvih de youq ndawsim Cinz Lieng gaenq deng Diuqmeuz dingjlawh lo.

  Miz ngoenz ndeu, aenvih Vangz Ci manzgyangq guhsaeh, mbouj dingq Cinz Lieng daezsingj, deng saw bae seuqsat.

  Cinz Lieng naeuz: “Diuqmeuz haengjdingh mbouj dwg yienghneix ok baiz, mwngz bemx lai.”

  Vangz Ci cingq simnyap dangqmaz, ngeix hix mbouj ngeix couh yaek fak faj fwngz ndeu hawj Cinz Liengz, hoeng fak mbouj dawz, aenvih doengzseiz miz geij faj fwngz laengz dawz faj fwngz de, gyoengq nyezrauh cibngeih cibsam bi haenx, cingq daengxda cimyawj de, yienghceij lumjnaeuz yaek doxhoenx nei. Vangz Ci dangciengz couh unq roengzdaeuj.

  (12)

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部