当前位置: Sawcuengh > yiengh ndei Mbanjcuengh

Vwnzva Gijgwn Daegbied Gag Miz——

“Daizbyaeklaux Cuengh Yauz”

2020年09月04日    来源:广西民族报    作者:Maj Veiyungz comz hoiz    字号:[    ]

Haeuxfaengx Mbanjcuengh noix mbouj ndaej.

“Daizbyaeklaux Cuengh Yauz” hawj vunz myaiz raengh.

Lwgmbwk Cuengh Yauz angq daihhek.

Beixnuengx doxrop doxgingqlaeuj.

Eu fwen gingq laeuj angqcoux baengzyoux.

Yiengzbya Caetbakrungh dingh aeu miz.

Gijgwn cingqcingh bonjdieg vunz gyaez gwn.

Byaekyiengh lwedyiengzseng.

Bouxhek angqyangz comz gwn.

Ndoengjbyaek Bouxyauz yaek miz faenh.

Laeujvan gingq baengzyoux.

  “Daizbyaeklaux Cuengh Yauz” dwg Dava Yauzcuz Swciyen dieg “diegfuk ciengx ndang, mbanjranz feihgwn” neix gaiq baizgim lwenqda ndeu! Byafuzyungz mbanjgyaeu、naengj byagienj lujmba、gyaujswj nohbya nohyiengz、daezyiengz fwngzgaem、nohyiengzgoeb Caetbakrungh、gaeq cazgoujleixhom……Dan dingq gij cohbyaek neix couh hawj vunz bak mbuemj myaiz raengh.

  Dava dwg aen mbanjranz souhyienz Cungguek miz Yauzcuz、Bouxcuengh、Bouxgun daengj 14 aen minzcuz doxcab comzyouq ndeu, ndaw yienh riuzcienz miz fwengeq saenzvah Baeuqroxdoh Bouxcuengh, fwengeq Mizlozdoz Bunujyauz, miz gij cienzdoengj laeujriu、gyau lauxdoengz lauxgeng. Gij doxgaiq feihgwn Cuengh Yauz Dava daj Mingzciuz couh cienz roengzdaeuj, riengzdwk lizsij caemfouz gyoebbaenz cungj vwnzva feihgwn daegbied gag miz aeu “daizbyaeklaux Cuengh Yauz” guh daiqbiuj ndeu.

  “Daizbyaeklaux Cuengh Yauz” dwg cungj vwnzva gijgwn gag miz beixnuengx Cuengh Yauz Dava youq ngoenznaengz dajcawj ndawde cugciemh gyoebbaenz ndeu, gungh miz 88 dauq byaekfeih, 118 cungj byaek, bau miz raemxcaz、 laeuj、 byaekdeb’iq、byaek daegbied、raemxdang、byaekcaep、byaekndat、byaekhoengq nem byaek saejdaeuz 7 daihloih, binjloih lai yiengh, saek moq singjsien, feihdauh haekfeih, nyex vunz myaiz raengh. “Daizbyaeklaux Cuengh Yauz” gij liuhbyaek de ndujdaeuz cingqcingh、sengcingz seuqsat, cungj dwg Dava bonjdieg gag miz, miz gij bya’gyaeujloz Dava ndaw Dahraemxhoengz, miz gij yiengzbya Caetbakrungh、gaeqdoj Caetbakrungh ndaw Yangh Caetbakrungh, lij miz gij maenzhau gwnz bya sang Dava、haeuxyangz fouz goenghaih、haeuxnaz miz sih lai Lungzgouj、byaekheu、raetgwn、moundaem doj、lwgrazbag daengj baenz bak lai cungj. Mwh dajcawj gangjgouz feihdauh nyuenz miz, louz gij yingzyangj ndaw byaek- gwn lailai, mboujdan feihhaek daegbied, vanjliz ndaej doeng saimeg raeuj aendungx、bouj yaem coengh yiengz dem. Bi 2017 ndwen 9, “daizbyaeklaux Cuengh Yauz” ndaej Gvangjsih Dajcawj Gwnndoet Hangznieb Hezvei soengq hawj aen cwnghauh “Gijbyaek Mizmingz Byaekgveiq Guengjsae”; youq “2018 yiengq seiqgyaiq fatbouh gijbyaek mizmingz Cungguek” hozdung ndaw- de, “daizbyaeklaux Cuengh Yauz” Dava aeu ndaej aen cwnghauh “Gijbyaek Cungguek· Daengx Guek Rangh Sengj Gijbyaek Mizmingz”, baez daih’it ndaej senj haeuj Cung- guek gijbyaek mizmingz mingzloeg.

  “Daizbyaeklaux Cuengh Yauz” dwg gijgwn haekfeih gyoebcomz gyoengq beixnuengx Bouxcuengh Bouxyauz Dava, yienjok gij gietcomz dungxcaiz coengmingz song aen minzcuz neix, caemh daiq miz gij eiqsei minzcuz doxgiet caeuq dox- gyau “baih mwngz miz gou, baih gou miz mwngz” haenx, yienh’ok gij vwnzva daegdiemj Dava gak cuz lwgminz vwnzva gijgwn gvangqlangh lai yiengh, hailangh bauyungz、lai cungj lai yiengh haenx.

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部