当前位置: Sawcuengh > lwnh vahsaw raeuz

Cimz Raemxgyu Rox Dauhleix

——Son Hagseng Mbouj Simnyap Lai

2020年07月10日    来源:广西民族报    作者:Luz Liujyen/卢柳燕    字号:[    ]

  Mboengqneix, gou raen dah hagseng ndaw ban gou——Senhsenh bienq lo, mboujdan bienq baenz boux vah noix naj mwt, yawj de bouxvunz hix miz di ndang unq naj saep, couh bienq baenz bouxvunz wnq ndeu——caengz raen yienghsiengq de baenz- neix gvaq.

  Haet neix romh de daeuj funghbanhgoeng gyau cozyez, gou caeuq de gangj le song coenz, naemj daj ndaw vah de ra ndaej yienzaen roxnaeuz raen di di riz. Gou ngamq cam de mboengqneix hagsib baenz- lawz yiengh, couh raen de raemxda yaek giengx rim song gvaengzda lo. Gou rox ndaw sim de itdingh miz saeh sawj de nyapnyuk yousim lo, couh mbouj caiq gamj cam lai, cij lwnh de haeuj ndaw ban bae hagsib gonq, langhnaeuz nyienh caeuq lauxsae gangj vah ndaw sim, seizlawz ndaej hoengq couh daeuj funghbanh- goeng lwnh gou, roxnaeuz sij roengzdaeuj lwnh gou hix ndaej.

  Banngaiz cuengqhag le, gou cingq youq ndaw funghbanhgoeng sou doxgaiq yaek dauqranz, cijraen Senhsenh coemjsiengsieng buet haeuj funghbanhgoeng, song fwngz yienh song mbaw ceij hawj gou, cieplaeng youh dauq buetnini okbae lo.

  A! Gou mbehai song mbaw ceij neix, raen gwnz ceij raiz rim cihsaw, deihdaendaen bae lo. Dah neix miz baenzlai simsaeh? Gou sikhaek daj goek daengz byai coenzcoenz cungj yawj liuxcaez bae……Yawj sat le, gou couh rox dah neix dwg vih gienh saeh gig bingzciengz ndeu cix baenz ngoenz najmwt simnyap mbouj haisim. Gou dajsuenq aeu gij guhfap doenghbaez daxboh son gou haenx daeuj bang Senhsenh ndaw sim mbouj caiq nyapnyuk lai.

  Lajbyonghngoenz hwnjhag, gou heuh Senhsenh daeuj funghbanhgoeng gwn raemx gangjgoj. Senhsenh haeuj funghbanhgoeng le, gou youq gwnz daiz baij ok song aen boisuliu cang raemx haenx hawj Senhsenh yawj. Senhsenh miz di ngeizvaeg, yawj le yawj gou, raen gou naj riunyumnyum, de menhmenh dawz song aen boi suliu baij youq baihnaj songdou. Ciep dwk gou heuh Senhsenh dauj song gaemz raemx coq aen boi daih’it, dauj raemx coq aen boi daihngeih rim bae. Caj de dauj ndei raemx coq song aen boi le, gou daj ndaw daeh dawzok aen daehsuliu cang miz gyu okdaeuj, hawj Senhsenh aeu geng daek gyu coq ndaw boi bae, aen geng aen geng, ngauz song ngauz, caiq heuh Senhsenh cimz gij raemx ndaw boi. Gou sien ndenq boi raemx loq lai di hawj Senhsenh cimz. Cij raen Senhsenh hoihhoih daep bak gvaqbae swd gaemz raemx iqet ndeu couh ndwnj roengzbae lo. Raen de ndwnj raemx roengzbae, gou unqswnh dwk cam:“Senhsenh, gaemz raemx neix ndeigwn lwi?” Senhsenh naj riumyum dwk naeuz:“Miz di gom, youh miz di van. ”

  “Mwngz caiq cimzcimz gij raemx aen boi neix yawjyawj.” Gou gaem hwnj aen boi gwnz daiz, ngauz le ngauz, ndenq hawj Senhsenh. Senh- senh ciep dawz boi couh ndingq haeuj bak. “Bu……” Raemx ngamq haeuj bak, Senhsenh couh nyaeuq najbyak rueg le okdaeuj. Gou raen de yiengh gig nanzsouh couh cam: “Dwg gijmaz feihdauh?” Senhsenh iet linx raez- ranghrangh nanzsouh dwk hemq: “Hamzngaungau……youh miz di haemz.”

  Yawj Senhsenh yiengh nanzsouh baenzneix, gou sing unq vah raeuj doiq de gangj:“Senhsenh ha, raeuz ciuhvunz couh lumj aen boi, gij nyapnyuk couh lumj geng gyu raeuz ngamq daek hwnjdaeuj haenx, langh raeuz dawz aen sim cuengq hung di, couh lumj gij raemx ndaw boi ityiengh, raemx yied lai, gij raemx couh heuz ndaej yied saw, feihdauh couh gig ndeigwn; langhnaeuz aen sim raeuz mbouj cuengq ndaej hai, lumj aen boi raemx gig noix neix, aenvih raemx noix, heuz mbouj ndaej saw lai, gij feih de couh ndwnj mbouj ndaej roengz dungx, yienghneix raeuz couh raen gig nanzsouh lo. Ciuhvunz duh raeuz, bouxboux cungj miz saekdi nyapnyuk, hoeng raeuz roxnaeuz gaej dawz gij nyapnyuk haeuj sim, roxnaeuz gag rox baenzlawz heuzsaw gij nyapnyuk neix bae. Baenzlawz heuzsaw gij nyapnyuk neix ne?”

  Gou dingz le dingz, yawj le yawj song boi raemx gwnz daiz, cienq naj youh yawj le yawj Senhsenh, cijraen Senhsenh hix cingq yawj dwk song aen boi gwnz daiz ngaezngwdngwd, gwnz naj loq yawj ndaej ok miz di haisim. “Doeng lwi?” Senhsenh yiengh lumj rox aen dauhleix neix gvaq, coh gou ngaekngaek gyaeuj, gou hix haisim dwk coh de riuriu, yaepda heuh de haeuj ban bae caeuq doenghzhag laebdaeb hagsib.

  (作者单位系来宾市兴宾区城厢中心小学)

编辑:韦亦玮

公众号

抖音号

本报投稿邮箱:

gxmzbzb@163.com

gxmzb2@163.com

回到顶部