当前位置: Sawcuengh > faenzcieng fanhoiz

Gep Canzcog Caenj Mbouj Ok(3)

2020年06月22日    来源:广西民族报    作者:Betgouj sij Liuz Yizningz hoiz    字号:[    ]

  Hoeng saehyak gig saetnaj, saeh saetnaj ceiq hung, mboujmiz bien mboujmiz henz. Danghnaeuz aen aek de dek, gij saehhux lumj raemxrongz nei riuzruru okdaeuj, couh dumx baenz daengx biengz bae. Engq aeu mingh dwg, gij saehhux neix deng vunz rox lo, yienznaeuz gyoengqde daep moegnyeg cang moengzloengz. Gangjnaeuz gij saehhux haenx seizneix lij venj youq gwnz naj de, gvenggvak mbouj bae, de baenzlawz byaij haeuj ndaw vunzlai bae ne?

  De ngeix daengz ngoenzneix ngamq doeg gvaq bien faenzcieng sij “mehhenmaiq” ndeu, couh gietsim caeuq bawxmoq lwnh baez ndeu.

  “Mwngz cungj mehmbwk mbouj dij saek faen ngaenz neix, mehndwet, baihvaih mingzdaeuz cojcoeng ranz dou. Mwngz mboujmiz sim mboujmiz daep, caenh dwg dong haexma ndeu. Mwngz sikhaek ringx okbae……”

  Ma daengz ranz, lwggwizmoq hai aen douled, youh byaengq doufungh liux, yawhbienh gyaep de deuzbae, lienz gij heiq de cungj mbouj ndaej louz roengzdaeuj. Hoeng bawxmoq naengh youq henz ndang de, daejnge’nge, gouz de nyiuz bonjfaenh. Hoeng de baenzbaenz naeuz:“Ringx okbae, mwngz dingqnyi caengz, mwngz mbouj aeunaj ha? Gaej uq gizdieg gou. Gou moeb mbat dwngx hawj mwngz! Caeuq bouxvunz mbouj aeunaj lumj mwngz guhhek, mboujyawx bae diuq louz suenq lo……Dingqnyi lwi?”

  Fajfwngz lwggwizmoq fak gvaqbae, dwngx youh moeb mbat ndeu, bawxmoq laemx ai youq gwnzdieg, lwed daj laj ndang de conh okdaeuj.

  Seizneix goengbuz bae gizlawz ne, miz vunz gangj dwg bae ranzcoj Haijnanz. Ndigah, caj gyoengqde dauqma daengz ranz, cij ganjhwnj gij siusik hawj vunz siengsim yaek dai neix: Bawxmoq seng roengz daeglwg ndeu le couh gatcaw lo, lwggwizmoq cix deng baicuzsoj gaemh bae.

  “Baenzlawz dwg yienghneix?”

  Loz Siujhungz dingz youq gwnz congz hausaksak, byoemgyaeuj nyoengqyatyat, gvaengxda caeuq aennaj gawh ndaem, conghbak ajngab genggaengx. Caiq hix mbouj ndaej gangjvah lo, coenz vah ndeu hix mbouj louz roengzdaeuj. Ukgyaeuj gyausou hoengqvatvat. De roxnyinh Loz Siujhungz dai lo, daengx aen seiqgaiq de couh gaenriengz doemq lo. Gij nditndat heux youq seiqhenz de haenx mbouj lumj doenghbaez lo, gij saeh neix dwkceih de cungj muenhluenh liux, yaek diemheiq mbouj hwnj bae. Hoeng de caenhrengz nyaenx gij gamjcingz bonjfaenh, mienx ndaej bouxwnq yawj ok de siengsim lai. Seizneix mbouj oksing maenhgvaq oksing, de mbouj w saek sing. Gingjcaz naeuz de nyi, daeglwg de gaenq nyinh dwg bonjfaenh de gaj vunz.“Cij dwg de gag siengj baenzneix guh, mbouj aenvih gizyawz.” Gangj coenz vah neix seiz, boux vunz haenx gig yiemzsuk. Gyausou dingq le, gyaeuj duengq naj saep, gaendwk de sawqmwh cienq ndang coh douhenz byaij okbae. Byaij daengz bakdou, de cienq ndang gvaqdaeuj, ndaw da riengx raemxda, youhcaiq byaij dauqlaeng, lajnaengbak cumxcwd lij duep doxroengz. De supsup aen ndaeng, aeu mbaw gaen uetuet naj, vah mbajdwddwd naeuz:“Ndaej mbouj ndaej……”

  Hoeng de ngeizvaeg lo, sawqmwh dingh roengzdaeuj, naengbak aj ndaej lumj deng dumq gvaq nei. De couh baez yamq baez yamq byaij ok rog dou bae.

  Saehrwix gienh dem gienh. Bi ndeu gvaq le, mehyah gyausou gvaqseiq lo, gyausou gag ciengx daeglwg majhung. Daeg haenx maj hung le, rox daengz gij saeh bohmeh, de gaj dai “daxboh” ngamq oklauz haenx le, bonjfaenh hix deng bae naenghlauz, youhcaiq youq baez oksaeh ndeu deng vutmingh.

  Seizneix gyausou geq lo. De gag youq ndaw doengh ranzlaeuz.

  “Deng lo, haemhlwenz, gou raen Loz Siujhungz, youq ndaw funghranz de, youq ndaw funghranz saeknoh haenx, dwg youq ndaw fangzhwnzloq.”

  Gyausou ndang baez saenz: Ciuq baenzneix gangj de youh dauqma lo, gou lij mboujcaengz vut de deuz!

  Gaxgonq de coemh gvaq gij siengq de caeuq Loz Siujhungz caemh ingj haenx, lij mbat dem mbat dawz de sij roengz bonj bitgeiq, yo de youq ndaw saw, siengj mbouj hawj de daeuj gaujcauz, hoeng de baenzlawz cungj mbouj lumz ndaej dah de. De lumjbaenz mbouj aiq yawjnaek duenh cingzngeih neix, hix mbouj rox baenzlawz gaijgez ndei bae.

  “De caeuq gou gangjvah la?” Gyausou nyapyuk gag cam.

  “Mbouj……mbouj.” De gag dap vah bonjfaenh naeuz.

  “Loz Siujhungz, mwngz rox gou cingq guhmaz lwi? Haujlai baez youq gyanghwnz singj daeuj, gou dwg yienghneix heuh aen coh mwngz.”

  “Gou rox liux, gyausou! Gou coengzlaiz mbouj guh gij saeh mbouj naemj cingcuj. ”Gyausou lumjbaenz youq ndaw fangzhwnzloq dingqnyi de hoizvah: “Couh yienghneix……Gou caenh rox genhciz……Saehyak, naeuz hawj vunzlai……Saeh- yak.”

  Saehyak mbouj youqgaenj lo. Hoeng gig geizheih, de cungj dwg yienghheix okdaeuj caeuq de gangjvah, ngoenzngoenz cungj dwg. De vanzlij dwg yienghhaenx, mbouj bienq, lij caeuq gyausou dajdingq gij cingzgvang bouxlwg. Baenzlawz guh ne? Dangnaeuz gou mbouj hawj de guh lwgbawx couh baenz lo.

  Gyausou dauqngeix duenh saedceij gaenq gvaqbae haujlai nanz neix, seizhaenx, Loz Siujhungz ngeihcib it bi, songde gaenq roxnaj gig nanz lo. De cungj ndaejgeiq fajnaj caeuq gijriu de. Gyaeundei? De gaenq gangj mbouj cingcuj. Simsingq? De mbat raen dah de couh baenzneix haengjdingh. Gijneix cingq dwg de hawj vunz nanz lumz haenx. Mwh de dawz bien lunvwnz haeuj daengz gohyenzsoj gyausou cawjguenj, ndwn youq dangqnaj gyausou seiz, gyausou youh doeksaet, youh sim’angq, roxnyinh de dwg loqsiengj, lumj dahsien nei haeuj ndaw ukgyaeuj. De seizlawz haidaeuz gyaez de, gaenq geiq mbouj ndaej lo.

  Mbwn gaenq laep lo, gou baenzlawz mbouj roxnyinh saek di? De yawj hwnjdaeuj gig mbouj vuenheij, lumjbaenz ngoenz ndeu couh yienghneix sai bae lo. Ngoenzneix, de cungj dwg dauqngeix, gij saedceij seiqvunz lw neix, nanzdauh couh baenzneix gvaq? Loz Siujhungz ndaej cwxcaih lumj rumz mbin lo, vihmaz aen sim bonjfaenh lij baenzlai caemnaek? Gaxgonq de ngeix gvaq caj daeglwg oklauz le naeuz gij saedsaeh hawj de rox, hoeng daeglwg gaenq dai lo; de hix ngeix gvaq dawz gij saedsaeh naeuz hawj “bouxlwg daeglwg” rox, hoeng de hix dai lo; de caemh ngeix yaek lwnh gij saeh hawj vunzlai rox caez, hoeng bouxlawz youh siengj dingq ne?

  Ngeix daengz gij ndwenngoenz ciep roengzbae mbwqmbat haenx, gyausou sawqmwh roxnyinh gyanghaemh bienq ndaej engqgya maedsaed, engqgya hawj vunz nanq mbouj ndaej daengz, hojsouh dangqmaz, hix engq miz dig’eiq, lumjbaenz mbwn mbouj caiq rongh lo, lumjbaenz bonjfaenh gag boux vunz dog lix youq diegsa gyanghaemh laepcup. De moenghmangh benz hwnj mbaeklae, gig nanz cij hwnj daengz ngeih louz, ndwn youq dangqnaj conghcueng, lumj siengqdeu gaenq giet geng nei, cimyawj ndaw laep. Saehgonq youh lumj nonnyaiq nei ruenz haeuj ndaw sim de, lumj ndoengfaex deng feiz coemh gvaq le youh laebdaeb dawzfeiz nei, mbouj ndaej dangx, youhcaiq youq dangqnaj de myab lo.

  (3 sat)

公众号

抖音号

本报投稿邮箱:

gxmzbzb@163.com

gxmzb2@163.com

回到顶部